‘What Book and Literature Festivals!!! کیہڑے کتاب تے سُلیکھ میلے !!!’ by Zubair Ahmad

اجکل دکھڻی لہندے ایشیاء وچ کتاب تے سُلیکھ (ادب) میلیاں دا ہڑھ آیا ہویا اے۔ اک میلہ مُکدا اے تے دوجے دا رولا چھوہ پیندا اے۔ پچھے جے پور دے میلے دی دُھم سی جتھے ساڈے دیس توں عائشہ جلال تے فاطمہ بھٹو نے رلت کیتی۔ تے رپوٹ موجب میلہ وی لُٹ لیا۔ ایتھے عائشہ جلال جی مخول مخول وچ ایہہ گل وی کہہ گئے پئی ہڻ پاکستان دا نمبر اک ویری بھارت نہیں سگوں امریکا اے تے بھارت تیجے نمبر اُتے چلا گیا اے ۔ کسے نے پُچھیا 2 نمبر ویری کوڻ اے اوہناں ہسدے ہسدے آکھیا میر خیال اے اسرائیل۔

ایتھے ای بھارت وچ پاکستانی سفیر ایہہ وی آکھیا پئی بھارت نال امن دے وشے اُتے فوج، ساریاں سیاسی پارٹیاں تے لوک اکو پنّے اُتے نیں۔ اُنج ایس میلے وچ بوہتا رولا سلمان رُشدی دے آؤڻ دا سی پر اوس ورودھ وکھالے چھوہ پئے تے اوہ ڈردا نہیں آیا۔ پھیر آکھیا اوس دی وڈیو راہیں گل بات وکھائی جائے گی اگلیاں ایہہ وی نہ ہووڻ دتا۔ ایس میلے وچ سبھ توں ودھ ہند سندھ دے انگریزی لکھڻ آلے لکھاریاں دا آدر کیتا گیا لوک اوہناں نُوں سُڻن لئی اُتاولے سن۔ میں ہندوستان دیاں دوجیاں بولیاں وچ لکھڻ آلے لکھاریاں دے ناں لبھدا رہیا پر پتہ نہیں سارے لوک بولیاں دی لکھاری کتھے گواچ گئے نیں۔ نرے اوہناں لکھاریاں دی چڑھت اے جو بھاویں پاکستان دی ہووڻ یاں ہندوستان یاں انگلستان دے بس اوہناں دا انگریزی وچ لکھڻا شرط اے۔

جے پُور دے میلے مگروں لہور وچ ست دناں دا کتاب میلہ ہویا ایتھے وی جنے لوک انگریزی دیاں کتاباں دے سٹال اُتے سڻ اونے اسلامی تے اُردو دیاں کتاباں دے سٹال اُتے نہیں سڻ۔ صاف نظر آؤند ا پیا سی پئی جنی کمائی انگریزی کتاباں دی سٹال اُتے ہوندی پئی اے اوس دے تول وچ اسلامی کتاباں تے اُردو والے مکھیاں ای ماردے پئے سڻ۔ ایہہ ساڈی کوئی اُردو نال لڑائی دی گل نہیں سگوں ایہہ سچ اے پئی انگریزی اُردو نوں کھا گئی اے۔ ساڈی بولی پنجابی دی تاں کوئی تھاں نہیں سی ایس لئی ساڈی تھاں تاں کوئی کُھسی نہیں پر اُردو دی کوئی تھاں نہیں رہی ہڻ معتبر لکھاری انتظار حُسین نہیں وکرم سیٹھ اے یاں پھیر ولایت وسدا حنیف قریشی اے۔ یاں پھیر ولیم ڈلریپر اے یاں پھیر اکسپلوڈنگ مینگو والا حنیف محمد اے۔

ایہہ ساریاں گلاں میں اج مُکے کراچی سُلیکھ میلے پاروں کہہ رہیا آں۔ کراچی اُردو دا گڑھ اے پر بوہتے نویں انگریزی لکھڻ آلے وی کراچی وچ جمدے پئے نیں۔ کراچی میلے دے 27 اکٹھاں وچوں نرے ست اُردو دے لکھاریاں بارے سڻ۔ تے سارا میلہ ہندوستان تے ولایت تُوں آئے لکھاریاں نیں لُٹیا۔ اک دو گلاں بڑیاں مزے دار نیں۔ کشور بہامنی دے سوال ”اوہ کیہڑے مدھیم وچ گل کرنا پسند کردے نیں” جگ دُھمی لکھارڻ شوبھا دیوی نے آکھیا :” ایہہ نہیں اے پئی تسیں کیہڑا مدھیم چُڻدے او سگوں گل ایہہ وے پئی تُسیں کیہہ گل کرنا چاہندے اوہ۔ اِنج ای ولایت وسدے لکھاری حنیف قریشی توں ایہہ پُچھیا گیا پئی اوہ آپڻی سیہاڻ دے سوال نُوں کیویں لیندے نیں تے اوہناں آکھیا :” میں ہڻ سوچڻا چھڈ دتا اے پئی میں کوڻ آں۔”

پر کیہہ ایس نال بندے دی سیہاڻ دا سوال مُک جاندا اے۔ تُسی لکھاری او انگریزی وچ لکھدے او ولایت رہندے اوہ پر تُسی انگریز تاں نہیں۔ کتے نہ کتے تاں سیہاڻ دا سوال دبی بیٹھے او۔

پر اصل گل ایہہ وے پئی دُنیا بدل رہی اے اُنج نہیں جیویں اسیں چاہیا سی۔اُردو دی تھاں انگریزی آ گئی اے۔ ایس پچھے کیہڑے سیاسی تے وسیبی کارن نیں اوہناں نوں لبھڻ تے اوہناں اُتے گل کرن دی لوڑ اے۔

پہلی گل تاں ایہہ وے پئی انگریزی دی فتح راس وال(سرمایہ داری) دی فتح اے۔ اوس دی بولی دی فتح اے۔ قوم پوجا دا وارا مُک گیا ہڻ گلوبل ویلیج دا وارا اے تے اوس دی بولی ای چلے گی۔ دوجی گل وچلے میل (مڈل کلاس) دا کھلار تے اوس دا جگت گیر ہوڻا اے۔ ایہو وچلا میل سی جو عبداﷲ حُسین دے ناول لبھ لبھ پڑھدا سی جو ہڻ حنیف محمد دا نواں ناول اُڈیک رہیا ہوندا اے۔ یاں پھیر اُردو دی آپڻی کہاڻی مُک گئی اے؟ ایہہ سوال نیں۔ جو نویں سیاست چُکدی پئی اے پراڻے ڈگدے وسیب وچ ویکھو نویں کیہہ واپردی پئی اے۔ ایس ویلے لوک بولی دے لکھاری نوں جنا سُچیت ہووڻ دی لوڑ اے خورے کدی وی نہیں سی۔

From Wichaar:
http://www.wichaar.com/news/124/ARTICLE/27992/2012-02-14.html

Zubair Ahmad is a poet, author, editor and educator residing in Lahore, Pakistan. Contact Zubair at:
kitab.trinjan@gmail.com
.
.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s